Gin-ako kag ginsaysay sang duha ka suspek ang pagpatay sa babayi nga nasapwan sa Hda. Catalina, Barangay Dos Hermanas, ciudad sang Talisay, kagab-i.
Ginkilala ang biktima nga si Jenalyn Alansay, 33-anyos, naga-trabaho sa manokan.
Ang mga suspek amo sanday Rene Boy, 44-anyos, residente sang Canlandog, Murcia, may asawa nga yara sa Manila, kag walo na ka tuig nga naga-trabaho sa manokan; kag Arnold Hampog, 34-anyos, residente sang Hda. Plegonia, Maao, Bago City, may ka-live-in partner, kag duha na ka tuig nga naga-trabaho bilang karga-tapas.
Sa interview sang Bombo Radyo Bacolod sa duha ka suspek, ila ginpatpat kun paano ginbuhat ang krimen sang Huwebes, Oktubre 8.
Suno diri, sila ang manghulam kuntani sang kwarta kay Jenalyn, apang gin-alegar wala sila ginpahulam.
Gani pwersa nga gin-agaw sang mga suspek ang bag sang biktima nga may unod nga P4,000.
Gin-alegar nagpamahog ang biktima nga isugid ang mga suspek sa ila nga boss rason kun ngaa ginlampusan ini sang dos por dos sa tangkugo kag ginkuga.
Gin-ako man sang mga suspek nga ila ginhimuslan ang biktima.
Matapos sadto, ila ginsulod sa sako ang biktima kag gintuwangan padulong sa pangpang.
Pila ka adlaw matapos ang krimen, nagpakuno-kuno pa ang mga ini nga nagbulig pangita sa nadula nga si Jenalyn.
WATCH: https://www.facebook.com/share/v/19NDj83sii/
Ila ginpahayag nga sila ang nakonsensya kag nagdesisyon nga itudlo na lang ang lokasyon sang bangkay.
Ginkumpirmar sang duha ka suspek nga sila ang nagagamit sang ilegal nga droga, kag ginpahayag nga ibakal kuntani sang droga ang hulamon nga kwarta kay Jenalyn.
Sila ang nakahunong na subong sa Talisay City Police Station.
Ginpahayag sang tag-iya sang Manokan nga si Manolito Risaba nga gina-trabahuan ni Arnold kag Rene-boy kasubong man sang biktima, nga ang duha mismo ka suspek ang nag-ako sa iya sang ila ginhimo nga krimen.
Suno diri, nakonsensya ang duha gani nagdesisyon nga isugid sa ila nga boss ang natabo.
Santo sa panaysayon sang duha niya ka trabahante, mahulam sila kuntani sang kwarta kay Jenalyn apang nagpamalibad ini kag didto na nag-umpisa ang krimen.
WATCH: https://www.facebook.com/share/v/1FR9wdon8J/
Suno diri, nagpanugid ang duha nga may nasapwan sila nga sako nga nagabaho na kag didto na nagsulod sa pinsar ni Risaba ang nadula nila nga trabahante nga si Jenalyn.
Nagduda naman ini kay Rene-boy kag Arnold bangud sila na lamang tatlo ang nabilin sa manokan sang Huwebes.
Suno kay Risaba, bag-o lang na-sweldohan si Jenalyn sang amo nga adlaw.
