Nagpanawagan ang election officer sang syudad sang Bacolod sa mga pumuluyo nga magparehistro sang temprano para sa May 9, 2022 local kag national elections.
Sa interview sang Bombo Radyo kay Atty. Kathrina Trinio – Caña, ginpahayag sini nga may yara sila sang ginatalana nga numero sang mahimo nga magtransact sa talatapan agud magparehistro.
Suno kay Caña, 100 ka mga tawo nalang ang mahimo nga makatransact kada adlaw, 50 porsyento diri ang para sa online appointment kag 50 porsyento ang para sa mga walk in.
Ginpahayag man sini nga mahimo nga makaparehistro online ang mga botante paagi sa pag-access sang Comelec website nga www.comelec.gov.ph kag iclick ang registration pagkatapos iclick ang irehistro kag magfill-out sang information field agud makarehistro.
Ang Comelec ang bukas halin alas 08:00 sang aga tubtob alas 05:00 sang hapon, Martes tubtob Sabado bangud ang Lunes ang natalana sa dis-infection sang opisina kag mahatagan sang ligwa ang mga nagatrabaho sang Lunes tubtob Biyernes nga makaparehistro.
Nahibaluan nga may yara sang 287, 383 registered voters ang Bacolod City apang ginatarget sang talatapan nga makarehistro sang 300, 000 ka mga botante.
