BACOLOD CITY — Magasugod na sa Oktubre 25 ang pagsukot sang Central Negros Electric Cooperative ukon CENECO sang dugang nga 8 sentimos kada kilowatt hour sa electric bill sang mga konsumidor.
Sa interview sang Bombo Radyo, ginpaathag ni CENECO general manager Sulpicio Lagarde Jr. ang igapatong sa bill sang mga gina-suplayan sang kooperatiba.
Suno kay Lagarde, ginatawag ini nga unnominated contract quantities matapos ang kontrata nga ginsudlan sang CENECO kag sang Kepco-Salcon Power Corporation nga ginakuhaan sang power distributor sang base load.
Paathag sang general manager, nagmandu ang Enery Regulatory Commission ukon ERC nga isukot sa mga konsumidor ang 232 million pesos nga balayran.
Ini ang katumbas sang 8 sentimos kada kilowatt hour ukon 8 pesos nga dugang sa bill kun 100 kilowatt hours ang konsumo sang isa ka member-consumer sa sulod sang 50 ka bulan ukon apat ka tuig kag duha ka bulan.
Suno kay Lagarde, wala sila sang liwan nga mahimo kundi ang magsunod sa mandu sang ERC.
Apang sa tion nga magmandu naman ang komisyon nga ipaiway ang pagpanukot bangud sa motion for reconsideration nga hingyuon sang mga grupo, gilayon man ini nga untaton sang CENECO.
Sa tion naman nga magmandu ang ERC suno kay Lagarde nga ibalik sa mga konsumidor ang ginsukot sang kooperatiba, igabalik man ini sang CENECO.
