Patay ang isa ka e-bike driver matapos ginluthang sa Mabini Street, Barangay 30, Bacolod City kagab-i.
Ginkilala ang biktima kay Johnny Lizo, 29 anyos kag residente sang Purok Katilingban, Brgy 40, Bacolod City.
Sa interview sang Bombo Radyo kay Police Captain Elmer Bonilla, station commander sang Bacolod Police Station 6, nagbakal sang isa ka kaha nga softdrinks si Lizo kag sang mabalik na kuntani ini, nagpondo ang isa ka SUV, may nanaog nga lalaki kag gilayon lang nga gintiro si Lizo.
Nakabati ang mga residente sang anom ka lupok.
Nakaangkon si Lizo sang igo sa nagkalain-lain nga parte sang iya nga lawas nga gintunaan sang iya nga kamatayon.
Nagpadulong naman sa norte ang salakyan suno sa station commander.
Gindugang man sini nga wala sang CCTV camera sa lugar sang insidente.
Nahibaluan nga nakaagi priso sa Police Station 6 ang biktima bangud sa kaso nga robbery.
Sa karun, gina-imbestigahan pa ang motibo sa krimen. Samtang,
Hustisya ang ginapanawagan sang pamilya sang isa ka e-bike driver nga ginluthang-patay sa Mabini Street, Barangay 30, Bacolod City kagab-i.
Ginkilala ang biktima kay Johnny Lizo, 29 anyos kag residente sang Purok Katilingban, Brgy 40, Bacolod City.
Sa interview sang Bombo Radyo sa iloy ni Johnny, nagahilibion ini samtang ginasaysay nga apisar may yara sang bisyo ang iya nga bata sang una, nagabag-o na ini subong.
Gin-ako sini nga imbolbado sang una sa Oplan Tokhang ang iya nga bata kag nakaagi man ini priso bangud sa pagpangawat apang suno sa iya, napasibangdan lang ini.
Suno sa iya, masami nga ginahambal ni Johnny sa iya nga wala na ini nagabisyo ilabi na nga may yara na siya sang pamilya kag mga kabataan.
Suno sa iloy, naga-ubra sa canteen sang isa ka eskwelahan ang asawa ni Johnny kag may yara ini sang apat ka mga kabataan.
Ang kamanghuran nga anak sang biktima ang naga-edad pa lamang sang 10 ka adlaw.
Ginatugyan naman sang amay sang biktima sa Ginoo ang natabo sa iya nga bata.
Sa interview sang Bombo Radyo kay Joseph Lizo, nagahingyo ini sang hustisya kag apisar nga indi madakpan ang mga suspetsado, nagapati ini nga may yara sa Diyos nga sarang maghukom sa ila nga gin-ubra.
Ginpahayag man sini nga nakamuno si Johnny sang nagligad nga mga binulan nga may yara ini sang nagakabatyagan nga nagasunod sa iya.
