Naserbe na ang show cause order sa regular employee sang Bacolod City Legal Office nga naggamit sang iya posisyon sa trabaho agud indi makabayad sa gin-inom sa isa ka bar.
Ginkumpirmar ni Bacolod City Mayor Greg Gasataya nga napirmahan na sini ang show cause order kag ini ang naserbe na sa empleyado.
Sa impormasyon, ginagamit sang empleyado ang iya papel sa pag-inspection sang business permit kag naga-inom sa bar nga wala nagabayad.
Ginhatagan ni Mayor Greg sang lima ka adlaw ang empleyado agud maghatag sang paathag.
Nahibaluan nga ginadumilian sa mga public government employees nga magbatun sang regalo, gani mas indi nagakaigo nga ginagamit ang pagpatigayon sang inspection para makalibre sa bar.
Luyag sang alkalde nga masunod ang due process antes magpagwa sang desisyon ukon magdagdag sang administrative charges.
Ini ang una nga nareport sa alkalde, apang sa flag ceremony sa Bacolod City Government Center sang Lunes, nagpahayag si Mayor Greg nga may-ara pa sang bag-o nga report nga sa karun ginaverify pa.
Sa karun, ang empleyado ang wala na ginapahanugutan nga maka-upod sa inspection, sa baylo ini ang ginhatagan sang iban nga obligasuon.
Panawagan naman sang alkalde sa mga negosyante nga may kaangay nga eksperyensya nga magreport.
Apang hingyo ni Mayor Greg nga kun magfile sang complaint, ini ang segihon agud wala na sang iban pa nga magsunod, bangod madamo sang mga sadto nagfile sang reklamo apang wala na ginafollow-up.
