Wala sang nasamaran sa tropa sang gobyerno matapos magluntad ang makadali nga engkwentro sa tunga sang militar kag New People’s Army sa Sitio Paraiso, Barangay 11 Gawahon, Victorias City, Negros Occidental alas-7:35 kagab-i.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion sang Philippine Army, ginapasanyog pa nila ang community support program sa nasambitan nga lugar bangod may-ara sang natalana nga itukod nga military facility sa area.
Samtang yara sa Temporary Patrol Base ang mga military personnel upod sa duha ka pulis, sila ang hinali nga ginpalukpan sang armas-luthang sang mga ginalantaw remnants sang Northern Negros Front sang NPA.
Suno kay Samoza, ginakabig ang lugar nga dako nga extortion corridor sang rebelde nga grupo, gani dako ang epekto sa ila nga aktibidad nga mahimo rasun sang pag-atake.
Naglawig naman sang lima ka minutos ang bayluhanay sang lupok.
Wala sang nasamaran sa tropa sang gobyerno, kag wala man natumod kun may nasamaran sa mga rebelde.
Aminado si Lamzon nga nakita nila ang trend nga hungod nga ginapalapit sang mga rebelde ang ila mga pag-atake sa mga matawo nga lugar, nga kaangay man sa natabo sa banwa sang Toboso.
