Gin-athag ni Negros Occidental Provincial Administrator Atty. Rayfrando Diaz nga enhanced community quarantine ang ipatuman sa probinsya.
Suno kay Diaz, indi lockdown ang pagahimuon kundi enhanced community quarantine kaangay sang ginpatuman sa Metro Manila para punggan ang paglapta sang coronavirus disease.
Ginpauna na sa press conference ni Gov. Eugenio Jose “Bong” Lacson nga ginapahibalo ang mga pumuluyo para gilayon man ini nga mahandaan sa oras nga iimplementar ang amo nga enhanced community quarantine.
Igahanda naman sang probinsya ang tanan nga LGU para magamit sa matawhay nga pagpatuman sang amo nga tikang nga pagasuguran sa Lunes, March 30, 2020.
Suno kay Diaz, sa bahin sang produksyon, medical supplies kag pagkaon wala sang kakulangan sa supply sang probinsya gani indi kinahanglan nga magpanic ang publiko.
Suno kay Diaz, tion na para seryosohon ang pag-atubang sa amo nga virus, kag matinguhaan nga mapunggan kag indi na magalab-ot ang kaso sa ospital.
Dugang pa, kulang ang mga hospital equipment amo man ang mga medical practitioner nga sarang maka-atubang sa madamo nga kaso kun makalab-ot pa sa mga ospital.
Pinaagi sa enhanced community quarantine indi na kinahanglan handaan ang mga hospital equipment kag bulog kundi handaan nalang sang mga pumuluyo ang nagapanguna nga kinahanglanon kaangay sang pagkaon, facemask, kag hygiene needs nga magamit sa panimalay sa sulod sang duha ka semana nga yara sa Enhanced Community Quarantine ang probinsya.
Samtang, ginpasiguro ni Negros Occidental Provincial Administrator Atty. Rayfrando Diaz nga ang mga bangko, gasolinahan, bakery, supermarkets kag ang mga kaangay sina ang bukas gihapon ang ila nga operasyon apang skeletal work force lang ang pwede nga maimplimentar sa tion nga ipatuman ang enhanced community quarantine sa probinsya.
Suno kay Diaz, magahatag ang kada barangay sang pahanugot sa isa lang sa kada pamilya nga makagwa para manggroceries ukon iban pa nga mga butang nga emerhensya nga kinahanglanon magwa.
Ginapanugyan nga magpreparar na ang tanan para sa Lunes tubtub sa sulod sang duha ka semana.
Ginapanawagan man sini sa tanan nga pumuluyo sa Negros Occidental nga mag-ugyon sa amo nga layi kag likawan na ang paglagaw apisar indi naman importante.
Suno kay Diaz, wala sang dapat ikabalaka ang mga pumuluyo nga maubusan sang supply ang tagsa ka banwa bangud ginsiguro man ni Gov. Lacson nga igadeliver lang ang mga supply sa kada banwa.
Ginapasalig man sini nga hugot nga igamonitor ang dalagan sang supply kag presyo sang mga produkto sa komersyo.
Ang Local Government Unit (LGU) magapangita man sang paagi para mahatagan sang bulig ang mga pumuluyo nga tuman ka apektado.
May yara sang nakapreparar nga bugas gikan sa NFA nga igahatag nga 800 sacks sa kada LGU.
Ginapaabot sini nga ang isa sa kapyutan amo ang pagtuo kag pangamuyo nga aton malampuwasan ang amo nga krisis.
