Gin-athag sang obispo sang Diocese of San Carlos kag isa man ka envoronmentalists nga wala ang ila grupo nagapamatok sa development ukon pag-umwad sang isa banwa apang dapat indi man makaguba sa palibot.
Sa interview sang Bombo Radyo Bacolod kay Bishop Gerardo Alminaza, upod ini sa proseso humalin sa pagsugod sang pagkampanya nga amligan ang kabukiran kag kagulangan sa banwa sang Candoni.
Suno kay Bishop Alminaza, wala sila nagapamatok sa development bangud luyag man nila nga mag-uswag ang banwa apang nabalaka ang mga ini sa epekto sang conversion sang Hacienda Asia Plantations Incorporated (HAPI) sang 6,000 hectares nga duta sa banwa agud himuon nga palm oil plantation.
Suno diri, ang sulat sang gobernador sa Department of Environment and Natural Resources (DENR) ang sabat man sini sa ila panawagan bangud dako na ang halit nga gintuga sang proyekto.
Ginapangabay sang grupo nga lantawon sang mas temprano pa ang plantation bangud samtang nagadugay nagadako ang epekto sa palibot.
Dugang pa sini sadto indi HAPI ang nagauyat sang proyekto bangud ang una gid nga gin-applyan sang mga ini amo ang reforestation gani wala nagkinahanglan sang Enviromnental Compliance Certificate (ECC).
Apang ginkakibot sang tanan nga Palm Plantation ang gintanom para sa paghimo sang Palm Oil.
Pamangkot man sini sa ahensya sang gobyerno kun nakaandan na lamang nga magpadayon ang isa ka proyekto apisar nga wala sang ECC.
Suno kay Alminaza naoverlook man ang lugar sang Indigeneous People kun sa diin kapin 1000 sa mga ini ang apektado sa nasambit nga plantation.
Ginakabig man sini nga dako nga kadalag-an ang pagsulat sang gobernador sang Negros Occidental sa bag-o nga secretary sang DENR nga imando nga untaton ang nasambit nga proyekto bangud wala sang ECC.
Dugang pa sini makapadayon lamang ang proyekto kun masiguro sa publiko ilabi na sa mga pumuluyo sang Candoni nga may yara sang nagakaigo nga pagsulundan nga ginaamligan ang palibot.
