Padayun pa ang mga evacuation efforts sa 5th District sang Negros Occidental.
Sa interview sang Bombo Radyo Bacolod kay Congressman Atty Dino Yulo, duha ka adlaw na ini nga tig alas-3:00 sang aga bangod madamo pa sang mga nagacontact nga nagapangayo sang ayuda kag rescue.
Suno diri, halos tanan nga banwa kag ciudad sa 5th District kahapon ang naka-eksperyensya sang madamol nga pag-ulan.
May mga nagkalatiphag man nga suba sa La Castellana kag Moises Padilla.
Pahayag sang konsehal nga doble na ang pag-antos sang mga Kanlaon evacuees sa La Castellana, bangod ang mga gintukod nga tent ang ginwaswasan sang mabaskog nga hangin kag ulan, kasubong man ang pagbaha nga tuga sang daludo sang tubig gikan sa ibabaw nga bahin sang bulkan.
Nagsalom man sa baha ang banwa sang Binalbagan kag porsyon sang Hinigaran kag Himamaylan City.
Suno kay Yulo, sa iya nga paglibot, may mga lugar nga ginpinsar sini nga makulpa na ang tubig-baha sa hapon apang sa baylo mas nagsaka pa ang tubig, samtang may iban man nga natigayon nga magsubside.
Panawagan sang kongresista nga kun nagapuyo sa ginabaha ilabi na ang mga suludlon nga lugar, maggwa na ngadaan kag magpadulong sa mga evacuation centers.
Pasalig ni Yulo nga bukas ang iya talatapan kasubong man ang mga local government units sa paghatag sang bulig sa mga nagakinahanglan.
Nagpadala naman sang food packs ang Department of Social Welfare and Development kag sila ang nagkoordinar man sa iban pa nga ahensya kaangay sang Department of Health.
