BACOLOD CITY – Ginatugyan na sang anay alkalde sang Bacolod nga si Monico Puentevella sa iya mga abogado ang pagsabat sa order sang Office of the President nga magsumiter ini sang verified answer may kaangtanan sa administrative case nga gin pasaka batok sa iya may kaangtanan sa isyu sang Real Property Tax (RPT).
Ini ang gin pahayag sang anay executive assistant ni Puentevella nga si Sarah Esguerra sa interview sang Bombo Radyo.
Sa order nga napetsahan Marso 9 nga gin issue ni acting Deputy Executive Secretary for Legal Affairs Ryan Alvin Acosta gin hatagan sang 15 ka adlaw si Puentevella nga magsabat reklamo nga gin pasaka ni Samuel Montoyo.
Disyembre 16, 2015 sang gin reklamo ni Montoyo sang grave abuse of authority and gross neglect of duty si Puentevella sa gin alegar pag pang kolekta sang real property tax sa ordinansa nga una na nga gin deklarar sang pebrero 18, 2015 sang Department of Justice nga null and void.
Samtang gin kwestiyon naman ni Esguerra si City Legal Officer Atty. Joselito Bayatan nga kaangay nga spokesperson ini ni Montoyo kag abogado sang Save Bacolod Movement nga gin representar sini.
Ini bangud suno kay Esguerra si Bayatan ang naga hatag sang pahayag tuhoy sa nasambit nga order sa baylo nga ang complainant nga si Montoyo.
Sa nahibaluan nga sa isa ka press conference si Atty. Bayatan ang nag-atubang sa media para sa pag hatag sang pahayag sa nasambit nga order sang Office of the President.
