BACOLOD CITY — Opisyal na nga nagpungko si Forester Andres Untal bilang Provincial Environment and Natural Resources Officer (PENRO) sang probinsiya sang Antique subong nga adlaw.
Si Untal ang isa ka Negrense kag nagserbe man nga PENRO sang Negros Occidental sadto.
Sa exclusive interview sang Bombo Radyo, ginpahayag ni Untal nga kaina sang aga lamang sang pormal ini nga nagpungko kag nagsugod ang iya pagpangalagad bilang PENRO sang Antique.
Ginpabutyag ni Untal nga bilang isa ka opisyal, panag-iya ini sang Republika sang Pilipinas kag nakahanda ini nga madestino sa lugar kun sa diin kinahanglan ang iya serbisyo.
Ginpabutyag sini dugang nga ang kadalag-an sang iya serbisyo sa Antique ang nagadepende sa suporta sang local government units (LGUs) didto.
Apang nagapati si Forester Untal nga ang mga Antiqueñao ang mapinalanggaon sa dunang-manggad kag magakooperar sa iya.
Gindugang pa sini nga pagpanghangkat para sa PENRO sang Negros Occidental ang ginpatukod nga mga estruktura, kalabanan mga resorts, sa sulod sang Northern Negros Natural Park (NNNP).
Si Untal ang nagapungko nga PENRO sang Negros Occidental sadtong mainit ang kontrobersiya sa pagdamo sang mga estruktura sa NNNP kag sang ginserbehan sang cease and desist order ang 94 ka mga nagpatukod sang building sa sulod sang protected area.
Suno kay Untal, nga karon bag-o nga PENRO sang probinsiya sang Antique, yara na karon kay PENRO Edgardo Rostata ang pagpanghangkay kun paano mapatuman ang nagakaigo sa sulod sang NNNP.
Sa una nga interview sang Bombo Radyo kay Rostata, ginpahayag sini nga iga-presentar sini sa pagsinapol sang Protected Area Management Board (PAMB) sini nga Septyembre ang mga rekomendasyon sa kun ano ang himuon sa mga estruktura sa sulod sanf protected area.
Apang suno kay Untal, indi lamang basta ipresentar kundi dapat ipaathag sa mga PAMB members kun ano ang nagakadapat.
Ginarekomendar man ni Untal ang personal nga pagsaka sang mga Community Environment and Natural Resources Officer (CENRO) sa bukid agud malantaw ang sitwasyon didto.
Apang suno kay Untal, mas maayo kun amat-amat na nga mahawanan ang NNNP gikan sa mga estruktura samtang wala pa napatukod ang mga minilyon nga balor sang propyedad nga sa ulihi pahawanan man lang.
