Nagretiro na sa professional football ang anay team captain sang Philippine Azkals nga si Phil Younghusband sa edad nga 32.
Ini santo sa social media annoucement ni Younghusband kahapon.
Kadungan diri ang iya pagpasalamat sa iya mga boss, coaches, teammates, competitors kag tanan nga nagsuporta sa iya journey.
Ang annoucement ni Younghusband, ang nagtapos sang iya professional career nga nagsugod sang 2005 sang nagpirma ini sa Chelsea FC nga isa ka English professional football club nga nakabase sa Fulham, London.
Matapos ang tatlo katuig nga nangin reserve player sang Chelsea, nagpauli sa Pilipinas si Younghusband kag ginpadayon ang iya karera.
Samtang diri sa Pilipinas, naghampang si Younghusband sa Loyola Meralco Spark kag Davao Aguilas tubtob sang 2018.
Upod sang iya utod nga si James, nakilala si Phil bilang miembro sang Philippine Azkals nga nangin responsable sa pagpanumbalik sang football sa Pilipinas.
Sa kabug-usan, nakapasulod sang 52 goals si Phil sa 108 appearances para sa pungsod.
Ulihi ini nga naghampang sa professional level sa historic maiden campaign sang Pilipinas sa 2019 AFC Asian Cup.
Nagsulod ang anay Azkals skipper bilang substitute sa tanan nga games apang wala ini sang goal nga napasulod.
