BACOLOD CITY — Ginpanindugan sang miyembro sang technical working group sang Negros Island Region nga indi dapat pagbasulon ni anay Presidente Noynoy Aquino sa pagka-dissolve sang NIR.
Ini bangud madamo ang komento nga padali lang ang pagtukod sang NIR sang Mayo tuig 2015 kag wala nakasaad sa Executive Order 183 ang pondo para diri.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, coordinator sang Provincial Planning and Development Office, nga sang nagsapol ang TWG sa Metro Manila, may ginpakita nga papel si anay Budget Secretary Florencio Abad nga may kuluhaan sang 19 billion pesos nga pondo para sa NIR.
Ugaling naglain ang tanan sang natapos ang eleksyon sa diin ginbalik ni Secretary Benjamin Diokno ang pondo sa orihinal nga source.
Suno kay Sanogal, hayag na gid kun sin-o ang may luyag nga bungkagon ang NIR.
Una na nga ginpahayag ni Presidente Rodrigo Duterte nga suportahan niya ang NIR kun amo ini ang luyag sang mga pumuluyo.
Kadungan sini, gin-athag ni Sanogal nga indi achievement ni anay DILG Secretary Mar Roxas ang NIR kundi iya ini sang mga Negrosanon nga madugay na nga nagdamgo sang paghugpong sang duha ka probinsya.
Nahibaluan nga si Roxas kag Diokno ang may konflikto sang pareho pa sila nga miyembro sang Gabinete.
