Nangin generally peaceful ang pag-obserbar sang Semana Santa sa bug-os nga Negros Island Region.
Sa interview sang Bombo Radyo Bacolod kay Police Lt Col Joem Malong, spokesperson sang Police Regional Office – Negros Island Region, wala sang may narekord nga untoward incidents kag natapos ang pagkomemorar sang Holy Week nga malinong.
Suno diri, kapin 1,000 ka police personnel ang gindeploy para sa public safety sa bus terminals, seaports kag highways.
Suno kay Malong, may mga incidents nga narekord regionwide apang kalabanan vehicular accidents nga narespondehan man.
Pahayag sini, natapos na ang Semana Santa apang ang mga kapulisan mapabilin sa area kun diin sila gindeploy para naman sa Ligtas SUMVAC 2026 initiative sang Philippine National Police. Samtang, nangin matawhay ang pag-obserbar sang Holy Week sa probinsya sang Negros Occidental.
Sa interview sang Bombo Radyo Bacolod kay Police Captain Judesses Catalogo, Public Information Officer sang Negros Occidental Police Provincial Office, wala sang untoward incidents nga nagluntad sa lugar nga may mga aktibidad ukon sa mga lugar nga masami ginapadulongan sang mga tawo.
Suno diri, kun may nagluntad man nga mga insidente, indi man ini related sa mga aktibidad sa Semana Santa.
Suno kay Catalogo, nangin succesful ang pag-implementa sang coverage sang kapulisan apang bisan natapos na ang Semana Santa, mapabilin nga magabantay ang kapulisan sa mga area nga masami ginapadulongan sang mga tawo bangod iban nagabalik-balik pa para naman sa summer vacation. Sa pihak nga bahin, wala sang may narekord nga major incidents ang Bacolod City Disaster Risk Reduction and Management Office sa pag-obserbar sang Holy Week.
Sa interview sang Bombo Radyo Bacolod kay Bacolod CDRRMO Head Dr Ma. Laarni Pornan, humalin sang Lunes sang tinalikdan nga semana tubtob kahapon, wala sang dalagkoan nga insidente nga nagluntad.
Suno diri, madamo sang nagpadulong sa baybayon bangod sa mainit nga panahon apang wala man sang may narekord nga insidente kag wala man sang may gindala sa ospital.
Suno kay Pornan, kahapon, Easter Sunday, nagpadulong sila sa barangay Pta. Taytay nga masami ginadagsa sang mga tawo para maligo sa baybay kag ila ginbatayan ang mga nagapaligo ilabi na ang mga kabataan.
Samtang, wala man sang may narekord nga road crash incident.
Pahanumdom ni Pornan, subong nga tuman ka init sang panahon, mas maayo nga magsuksok sang mabugnaw nga bayo kag likawan ang pag-expose sa init ilabi na kun alas- 9:00 sang aga tubtob alas- 3:00 sang hapon. Samtang, may pagnubo sa numero sang mga pasahero sa airport subong nga Semana Santa.
Sa interview sang Bombo Radyo Bacolod kay Police Major Deejay Domingo, Chief Philippine National Police (PNP) Aviation Security Group Bacolod-Silay Airport Police Station, sang tinalikdan nga tuig mas madamo ang pasahero nga nag-abot kag nagbyahe papaggwa kun ikumpara subong nga kaangay nga normal lang ang sitwasyon.
Suno diri, mahimo bangod sa krisis amo nga limitado lang ang byahe indi kaangay sa mga bus terminals kag seaports nga madamo sang pasahero.
Pahanumdom ni Domingo sa mga magabyahe nga magsunod sa protocol sang airport, timprano pa magpadulong sa airport kun may flight, likawan ang pagdala sang mga kontrabando kag indi maghimo sang bomb joke agud wala sang delay sa byahe.
