Malipayon kag nagpasalamat ang mga faculty sang College of Criminal Justice Education sang STI West Negros University bangud sa dungog nga nakuha sang eskwelahan matapos mag Top 1 sa bilog nga Negros Island Region kag Rank 3 sa Pilipinas nga nakakuha sang overall rating 95.35 percent sa natapos nga Criminology Licensure Examination.
Sa interview sang Bombo Radyo kay Dr. Liza Joy B. Barican, Dean sang College of Criminal Justice Education (CCJE) kag Ms. Ritchie Rose B. Ginete, RCrim faculty kag Review Coordinator sang CCJE, isa ini sa pinakadako nga achievement indi lang para sa eskwelahan kundi para man sa mga estudyante nga nagtinguha agud makapasar sa board exam.
Suno diri, isa sa mga sekreto sa ila nga kadalag-an amo ang ma id-id nga preparasyon ukon review antes pa man magkuha sang board exam ang ila nga mga estudyante.
Ginpaathag sini nga ang Unibersidad ang nagapatigayon sang open CCJE review program para sa mga estudyante agud may preview na sila sang preparasyon para sa board exam.
Sa sini nga programa, ginaimbitahan ang iban nga mga eksperto sa larangan sang criminology agud maghatag sang dugang nga nahibaluan para sa mga reviewees.
Pagkatapos sang graduation,suno diri, ginahatagan pa gid sang eskwelahan ang mga estudyante sang pre-board examination agud mausisa kun handa na sila sa pag-atubang sang national licensure exam.
Ang ini nga programa ang ginpatuman sang CCJE, tatlo ka tuig na ang nakaligad kun sa diin tinutuyo sini nga ma-orient ang mga estudyante lakip man ang ila mga ginikanan agud mapahibalo ang importansya sang pre-board.
Ginpasalamatan nila ang management committee sang STI West Negros University kag ang tanan nga faculty members sang College of Criminal Justice Education bangod sa padayon nga suporta sa programa sang Unibersidad.
