Ginmando ni President Ferdinand “Bongbong” Marcos Jr. ang pagsuspender sang pagpatuman sang fare increase sa mga pampubliko nga transportasyon nga ipatuman na kuntani subong nga adlaw, sa pihak sang tuman nga pagsaka sa presyo sang produktong petrolyo.
Pahayag sang Presidente nga indi ini ang nagakaigo nga tion para magpasaka sang pletehan, karun nga padayun pa ang kinagamo sa Middle East.
Sa video message ni Marcos, ginmando sini ang pagsuspinder sang Department of Transportation (DOTr) sa gin-anunsyar nga fare hike nga ipatuman na kuntani sumugod subong nga adlaw, ilabi na nga madamo sa mga commuters nga maapektuhan amo ang mga mamumugon, estudyante kag iban pa.
Ang desisyon ang ginpagwa sang Presidente isa ka adlaw matapos gin-aprubahan sang Land Transportation Franchising and Regulatory Board (LTFRB) ang fare increase, kun sa diin ang base fare sang traditional jeepney ang kuntani pasakaon sa P14 samtang ang base fare sang modernized jeepney ang mangin P17.
Pahayag naman sang DOTr nga sila ang magasunod sa mando ni Presidente Marcos.
Ginpasalig naman ni Marcos sa mga drivers nga magahatag ang gobyerno sang dugang nga suporta agud sila ang indi man matam-an.
Suno sa DOTr, ginapadasig na nila ang pagpanghatag sang fuel subsidies para sa mga kwalipikado nga drivers kag operators.
Ang ahensya ang preparado naman sa pagpatigayon sang mga “Libreng Sakay” program agud makabulig sa mga commuters.
