Nagtakop na alas-5:00 kahapon sang hapon, Desyembre 6, ang filing sang certificate of candidacy (COC) para sa mga pwesto sa Liga ng Barangay sang ciudad sang Bacolod.
Sa interview sang Bombo Radyo Bacolod kay Punong Barangay Carl John Magno sang Barangay 14, nga amo ang ginpili nga nomination committee chairman, un-opposed kag magapabilin bilang Association of Barangay Captain (ABC) President si Punong Barangay Lady Gles Gonzales-Pallen sang Barangay Taculing.
Samtang, un-opposed man ang pagpapili ni Punong Barangay Franz Tionko sang Barangay Mansilingan bilang Vice President.
Nare-elect man bilang auditor si Punong Barangay Jose Ma. Leandro De Leon sang Barangay Vista Alegre, bangod siya ang kaangay man nga wala sang kontra.
Bangod sini, ang mga nagapapili na lamang bilang Board Members ang dapat nga mahisayran.
Ang mga nagfile sang COC bilang board member ang ginalakipan nanday Punong Barangay Rodney Carmona sang Barangay Sum-ag, Punong Barangay Arnel Villamin sang Barangay Banago, Punong Barangay Jan Mark Petierre sang Barangay 30, Punong Barangay Jerry Tingson sang Barangay Estefania, Punong Barangay Yolanda Noble sang Barangay Pahanocoy, Punong Barangay Lope Ledesma sang Barangay 24, Punong Barangay Elmer Villanueva sang Barangay 40 kag Punong Barangay Rommel Flores sang Barangay Villamonte.
Nagfile man kuntani sang COC agud makapapili bilang Board Member si Punong Barangay Ruben James Miranda sang Barangay 35 apang ginkanselar sang nomination committee ang iya nga kandidatura matapos nga wala sini makumpleto ang mga requirements.
Bangod sini siyam na lamang ang mga nabilin nga kandidato para sa pagka-Board Members samtang walo naman diri ang makapungko sa pwesto.
Magapadala man sang personnel ang Department of the Interior and Local Government agud mag-obserbar sa eleksyon.
Ang eleksyon para sa Liga ng Barangay ang patigayunon sa Desyembre 15 subong nga tuig.
