Magapauli sang bronze medal si Filipina Boxer Aira Villegas apisar nga nalutos sa dikit nga hampang batok kay Turkish boxer Buse Naz Cakiroglu sa semifinals sa women’s 50kg boxing event sang 2024 Paris Olympics.
Tatlo ka mga judges ang naghatag sang score nga 30-27 samtang ang duha ang naghatag sang 30-26.
Sa una nga round, gindominar na ni third-seeded Cakiroglu ang hampang matapos magpaulan sang inumol, nga nagresulta sa pagtawag sang standing eight-count para kay Villegas matapos nga ini ang nasakam sang solid nga inumol sa guya.
Nagbawi naman ang Filipina boxer sa ikaduha nga round, kun sa diin napatumba sini ang Turkish boxer pinaagi sa iya ginbuy-an nga natuo nga inumol, apang ini ang gindeklarar sang referee nga slip ukon na-out balance lamang.
Sa third round, didto na kag nagbuya sang madamo nga combinations si Cakiroglu agud maseguro ang kadalag-an.
Si Cakiroglu naman ang labing una nga Turkish athlete nga nakaakong sang medalya para sa Turkiye.
Ini na ang ikatatlo nga opisyal nga medalya sang Pilipinas para sa nagapadayun nga 2024 Paris Olympics kasunod sang double gold medal ni Filipino gymnast Carlos Yulo sa men’s gymnastics.
Nahibaluan nga segurado naman ang bronze medal ni Filipina boxer Nesthy Petecio, apang ini ang magacompete pa para sa tinutuyo nga makuha ang gold.
