BACOLOD CITY–Nagdangat na sa 140 ang numero sang mga fire incidents nga nagluntad sa ciudad sang Bacolod humalin sang nagsugod ang Fire Prevention Month subong nga Marso.
Suno kay city fire marshal Fire Chief Inspector Publio Ploteña, 120 sa mga ini ang grass fire kun sa diin may mga katubuhan nga nasunog.
Sang tinalikdan nga tuig, 53 lang ang numero sang sunog nga narekord sa bilog nga bulan sang Marso.
Suno kay Ploteña, indi magnubo sa lima ka fire calls ang ila nagakabaton kada adlaw.
Subong nga tig-ilinit, madasig ang pagtuhaw sang kalayo kag madasig man ini nga maglaton.
Maayo lang suno kay Ploteña bangud magluwas sa anom ka mga sub-stations sa ciudad, may yara man sang mga volunteer fire brigades nga nagabulig sa pagresponde.
Bangud sini, nagpanugyan ang fire marshal sa mga pumuluyo nga likawan ang overloading sa outlet sang kuryente kag indi man mangin jumper.
Sa tion nga daan na ang switch suno sa iya, dapat nga islan na ini agud mangin hilway sa sunog kag indi pag-ihaboy bisan diin lang ang upos sang sigarilyo.
