Temporaryo nga nagatinir sa Sto Nino Chapel ang mga biktima sang sunog nga nagluntad sa Purok Kagaykay, Barangay 2, Bacolod City, kahapon sang kaagahon.
Sa interview sang Bombo Radyo kay Patricia Esmino, Social Welfare Officer 1 sang Department of Social Services and Development (DSSD), 85 tanan ka pamilya ukon 312 ka mga indibidwal ang apektado.
Suno diri, 71 ang totally damaged nga balay kag lima ang partially damaged.
Nahatagan naman sang food packs, mga bayo, frozen foods, bugas, tubig, hygiene kits, kag cash assistance ang mga evacuees.
Suno diri, may bulig nga ihatag ang gobyerno kun sa diin ang totally damaged ang makabatun sang P15,000 cash, P10,000 sa partially damaged kag P5,000 para sa mga renters.
Subong nga adlaw, iga-process ang paghatag sang cash assistance sa mga biktima apang dapat sila nga makapasa sang picture sang ila nga balay nga nasunog kag ID.
Kun wala naman sang ID bangod nga nadala sa sunog, may ihatag ang barangay nga ID para sa ila agud sila maka-avail sang cash assistance.
Samtang, halos kalabanan sa mga biktima sang sunog ang wala gid sang may nasalbar nga gamit.
Sa interview sang Bombo Radyo kay Angela Villarna, wala gid ini sang may nasalbar nga gamit bangod nga gin-una sini nga salbaron ang iya apat ka kabataan kalakip na ang pito ka bulan sini nga lapsag.
Suno diri, nagaproblema pa ini sa karun bangod nga naga-eskwela pa ang iya tatlo ka kabataan apang bisan ang bag-ong bakal nila nga gatas ang wala man lang nila nasalbar.
Dugang pa sini, tatlo na ka beses nga may natabo nga sunog sa ila nga lugar, apang nagpabilin sila sa gihapon nga magtinir didto.
