Nagalaom ang mga manugbaligya sang palupok ukon firecrackers sa ciudad sang Talisay nga maubos ang ila nga stocks tubtub sa katapusan sang bulan.
Sa interview sang Bombo Radyo kay Junmark Tan, presidente sang Talisay Firecracker Vendors Association, nagsugod sila sa pagbaligya sa Mabini Highway, Barangay Zone 14B, Talisay City sang Disyembre 22 apang kahapon lang nagdamo ang nagabakal sang palupok.
Ang nasambit nga asosasyon ang may 12 ka miyembro kag kalabanan sa mga ini ang nagadisplay na sang baligya.
Suno kay Tan, wala nagabaligya ang ila asosasyon sang prohibited firecrackers bangud nakahibalo ang mga ini sang ginadumilian kag ginapahanugutan kasunod man sang seminar nga ginpatigayon sang Talisay City government, Bureau of Fire Protection kag Talisay City Police Station.
Nahibaluan nga sa idalom sang Executive Order No. 28 ni Presidente Rodrigo Duterte, 0.2 grams lamang nga pulbura ang maximum nga unod sang isa ka palupok kag may silot batok sa magahimo kag magabaligya sang lapaw diri.
Suno kay Tan, sila mismo ang nagadepensa sa industriya paagi sa pagsunod sa husto nga regulasyon.
Agud nga masiguro ang ila nga seguridad, may nagabantay nga personnel sang PNP, BFP, Barangay Tanod kag diri man nagatulog ang mga vendors agud indi sila makawatan.
Ginbutangan naman sang screen ang higad sang dalan agud nga kun may maghaboy sang upos sang sigarilyo, indi ini magdiretso sa mga kiosko.
Suno kay Tan, ginalauman nga mangin mabakal na ang palupok sa Disyembre 29 tubtub 31.
