Patay ang isa ka suldado nga nagamaneho sang motorsiklo matapos nakabunggo sa Ceres bus sa Crossing Ambush, Brgy. Manalad, Ilog, Negros Occidental alas-6:30 subong nga Sabado sang aga, July 6.
Sa interview sang Bombo Radyo kay Police Major Joseph Partidas, hepe sang Ilog Municipal Police Station, nagikan ang Ceres sa Cauayan padulong sa Kabankalan samtang north to south naman ang direksyon ni Private First Class John Leo Saldua, miyembro sang 15th Infantry Battalion sang Philippine Army kag residente sang Purok Riverside, Brgy. Napoles, Bago City.
Santo sa imbestigasyon, nag-overtake si Saldua sa tricycle kag wala nakabalik gilayon sa iya nga lane gani nakabunggo ini sa sugata nga Ceres bus.
Bangud sa kakusog sang impact, nag-umpok si Saldua kag naglampos sa windshield ang iya nga ulo.
Nagdasok man sa idalom sang bus ang iya motorsiklo nga Yamaha R3 gani nayudyod sang bus si Saldua sang indi magnubo 10 meters antes ini nakapundo.
Gindala ang suldado sa Lorenzo D. Zayco District Hospital sa Kabankalan City apang gindeklarar nga dead on arrival.
Yara sa karon sa custody sang Ilog Municipal Police Station ang driver sang bus nga si Ryan Miravelez, 32 anyos, kag residente sang Brgy. Dancalan, Ilog, Negros Occidental.
