Wala gindayun ang tradisyon na nga fluvial parade sa Brgy Punta Taytay sa Bacolod City sa pagselebrar sang kapiestahan ni San Juan Bautista bangod sa malain nga tiyempo.
Sa interview sang Bombo Radyo Bacolod kay Punong Barangay Cliff Orlando Palma, ini kasunod sang rekomendasyon sang Philippine Coast Guard.
Nahibaluan nga tradisyon na nga ang fluvial parade ang ginapangunahan sang bangka kun sa diin ginasakay ang imahen ni San Juan Bautista, kag ini ang ginasundan sang iban pa nga bangka sang mga deboto nga nagahalad sang ambahanon.
Imbes nga magparada sa baybayon, ang ginhimo na lamang nila kaina amo ang pagmartsa kag pagtum-oy sang rebulto sa tubig kag nagpatigayon sang seremonya kag pagpangamuyo.
Suno kay Palma, apisar nga wala sang tradisyonal nga fluvial parade, ma-enjoy gihapon sang mga pumuluyo sang Pta Taytay kag mga Bacolodnon ang kapiestahan.
Suno diri, ginpalibot nila ang firetruck nga amo ang nagbomba sang bubbles para sa foam party.
May-ara man sang eat all you can sang mga sisi, talaba, kag baboy.
Antes paman ang kapiestahan, ginsapol na ni Palma ang mga opisyales sang Barangay kag pila ka pumuluyo agud maghatag sang pila ka pahanumdom.
Lakip na diri ang pagdumili sa pagbasya sang mahigko nga tubig, kag pagrespeto sa mga padulong sa trabaho.
Gani sa masami antes paman magbasya sang matinlo nga tubig, nagapamangkot anay ang mga pumuluyo kun magalabay ang sugot nga basyahan.
