BACOLOD CITY — Nagnubo ang mga foreign nationals nga nagtuon sang English sa ciudad sang Bacolod bangud sa martial law nga gindeklarar sa Mindanao.
Sa data sang Bacolod Immigration Field Office, 1621 ka foreign nationals nga ginalakipan sang 21 ka nationalities ang gin-isyuhan sang Special Study Permit sang tuig 2017.
Ang top 3 nationalities ang ginalakipan sang Korean, Japanese kag Taiwanese.
Ang kabug-usan nga numero ang mas manubo kun ipaanggid sa 2, 420 ka foreign nationals nga ginhatagan sang Special Study Permit sang tuig 2016.
Suno kay Mita Chuvy Arguelles, alien control officer sang Bacolod Immigration Field Office, may booking na kuntani sa mga language centers apang madamo ang wala nadayon humalin sang gindeklarar ang martial law sa Mindanao.
Diri makit-an suno kay Arguelles nga dako nga rason ang national security kag peace and order sa pag-abot sang mga foreign nationals sa Pilipinas ukon pag-atras nila sa pagbiyahe.
