Magapagwa pa sang dugang nga mga detalye, ebidensya kag mga pangalan si former Ako Bicol Partylist Representative Zaldy Co matapos ang una nga bahin sang iya statement nga gin-upload kahapon may kaangtanan sa pagkalakip sang iya pangalan sa korapsyon sa flood control projects.
Kahapon, nagpagwa sang statement si Co nga si President Ferdinand “Bongbong” Marcos Jr. mismo ang nagmando sang insertion kasubong man nga siya ang magpanago.
Ang video message ang first part pa lamang suno sa kongresista.
Suno diri siya ang indi na magahipos, kag ipagwa sini ang tanan nga may kaupod nga resibo, ebidensya kag pangalan.
Apang nagalaom ini nga mapagwa niya ang tanan, kag indi ma-unahan nga mapatay bangod ginagamit sang administrasyon ang resources sang gobyerno agud siya ang pahipuson.
Kun sa diin ginpahayag sini nga sa Bicameral process sang 2024, ginpahayag ni Budget Secretary Amenah Pangandaman nga may mando si Marcos sa pag-insert sang P300 billion projects.
Ginreport man sini ang impormasyon kay former House Speaker Martin Romualdez, nga nagpahayag “what the president wants, gets.”
Dugang pa nga bangod indi pwede nga mas dako ang budget sang Department of Public Works and Highways sangsa Department of Education, gani ginmando nga ini ang isulod sa unprogrammed funds.
Ini bangod ang unprogrammed funds ang wala na nagalabay sa mga mamalidha kag deretso nga gina-aprubahan sang Presidente.
Gani natingala ini sang magpahayag si Marcos nga wala ini sang ideya sa budget nga siya mismo ang nagmando.
Suno kay Co, sang magpadulong sa Estados Unidos para sa medical checkup, mabalik ini kuntani matapos sang State of the Nation Address apang siya ang gintawagan ni Romualdez kag ginmanduan nga indi magpauli kag ang Presidente na ang bahala sa iya.
Nagpati man ini sa umpisa, tubtob nga nareyalisar nga siya ang gingamit lamang nga tapalan para sa kampanya batok sa kurapsyon sang administrasyon.
Matapos ang iya pahayag, nagsaka pa ang interes sang publiko kag mga mamalidha sa posible nga mangin epekto sang nasambit nga mga rebelasyon sa administrasyon sa karun.
Ginalauman naman ang Part 2 sang iya nga mga ginbuyagyag nga mga detalye.
