Ginkumpirmar ni Senate President Pro Tempore Panfilo “Ping” Lacson nga nalakip si anay house speaker Martin Romualdez sa mga ginarekomendar nga kasuhan sa draft report sang Senate Blue Ribbon Committee may kaangtanan sa gina-alegar nga maanomalya nga flood control projects.
Ginpaathag ni Lacson nga nalakip si Romualdez sa ikaduha nga kategorya sang mga personalidad nga nasambit sa hearing kun sa diin ini ang mga indibidwal nga ang mga pangalan ang namitlang sa testimonya sang mga testigo apang wala sang direkta nga ebidensya nga nagapakita nga sila ang nagbaton sang kwarta.
Suno kay Lacson, apisar nga gin-akusahan sang surprise witness nga si Orly Guteza sa gina-alegar nga pagdala sang kwarta padulong nanday Zaldy Co kag Romualdez, wala man sang may napresentar direkta nga ebidensya nga nagbaton sang kickback ang anay House Speaker.
Dugang pa diri, nasambit liwat sa Senado ang mga alegasyon nga may kaangtanan kay Romualdez sa mga contractor nga sanday Sarah kag Curlee Discaya, nga ginapahayag gin-gamit bilang “front” sa pagbakal sang isa ka high-end nga propyedad sa Makati City.
Apang gin-athag ni Lacson nga wala sang na-isumiter nga ebidensya sa mga hearing nga magapamatuod sang amo nga mga akusasyon batok kay Romualdez.
Samtang, ginpahayag man ni Lacson nga magapatigayon sang meeting ang mga senador halin sa majority bloc agud talakayon ang mga isyu may kaangtanan sa draft report sang Blue Ribbon Committee.
