Wala gid natabangan si anay Silay City Mayor Carlo Gamban matapos nga gintiro sini ang iya kaugalingon subong nga Lunes sang hapon, December 2.
Sa impormasyon nga nakuha sang Bombo Radyo Bacolod, gintiro ni Gamban ang iya nga ulo sa sulod mismo sang ila nga balay.
Sa interview sang Bombo Radyo Bacolod kay Police Lt. Col. Mark Anthony Darroca, hepe sang Silay City Police Station, nakabaton sila sang report nagikan sa isa sa mga kabulig nga may nabatian sila sang lupok nagikan sa kwarto sang anay alkalde.
Gilayon man sang mga ini nga ginrespondehan.
Suno kay Darroca, sa inisyal nila nga imbestigasyon duha lamang ka timbang ang kaupod ni Former Silay City Mayor Carlo Gamban sa ila balay sang nagluntad ang insidente.
Suno sa hepe, ginkadtuan sang mga ini ang kwarto sang anay alkalde kag didto nakita nga wala na ini sang kabuhi.
Suno diri, nakaangkon sang igo sang bala sa ulo ang anay alkalde kag siya ang gindeklarar man sang doctor nga patay na mismo sa sulod sang kwarto sini alas 3:45 ang takna subong nga hapon.
Nagapadayon pa sa karun ang imbestigasyon sang mga kapulisan agud mahibaluan kun ano ang rason sang kamatayon sang biktima.
Ginpahayag man ni Darroca nga imbeteron man nila ang kabulig para sa dugang nga imbestigasyon.
Samtang sa pag-estorya naman sang Bombo News Team sa kabulig sang anay alkalde, ginpahayag sang mga ini nga ginsugo sang biktima ang asawa sini nga magbayad sang bill kag ginpagwa ang duha ka mga kabulig antes nabatian ang lupok sang armas-luthang sa sulod sang kwarto ni Former Silay City Mayor Carlo Gamban.
