Nagbag-o na sang posisyon ang gobyerno sang France kag desidido na nga magdeploy sang ila nga nuclear-powered aircraft carrier nga Charles De Gaulle padulong sa Eastern Mediterranean agud depensahan ang ila nga pwersa kag mga kaalyado nga pungsod batok sa serye sang pagpang-atake sang Iran.
Ang ini nga direktiba ang ginpagwa ni French President Emmanuel Macron matapos nga maigo sang Iranian drone strikes ang isa ka hangar sang French naval base sa United Arab Emirates (UAE) kag isa ka British airbase sa Cyprus.
Una na nga naglikaw ang France nga direkta nga magpasilabot sa ginapatigayon nga ‘Operation Epic Fury’ sang Amerika kag Israel batok sa Iran.
Apang napilitan ang France nga magpadala sang pwersa bangud sang direkta nga pagpanghangkat sa ila mga assets sa rehiyon.
