Sarang na nga maproseso ang mga public utility vehicle drivers nga wala nakaclaim sang fuel subsidy sang 2023 ang ila nga benepisyo.
Sa interview sang Bombo Radyo Bacolod kay Land Transportation Franchising and Regulatory Board (LTFRB) Region 6 Officer-in-Charge Atty. Salvador Altura, aminado ini nga nadelay ang releasing nakaligad nga tuig bangod nagkaproblema sa cards kag accounts.
Ginapa-alinton sini nga tanan nga qualified recipients sang 2023 ang sarang na nga makaproseso sa ila nga talatapan
Ang mga sarang makabatun sang fuel subsidy ang ginalakipan sang mga operators sang jeepney, UV express, mini-buses, shuttle services, taxi kasubong man mga tricycle drivers nga full time ang pagbyahe.
Ang mga tricycle operators ang makabatun sang P1,000 nga balor sang fuel subsidy samtang P6,500 naman ang mabatun sang iban pa nga operators.
Ang mga jeepney operators nga nagsulod na sa consolidation ang magpakig-angot lamang sa kooperatiba ukon korporasyon samtang ang mga individual operators ang kinahanglan nga personal nga magproseso sa ila talatapan.
Panugyan sini nga ipreparar na lamang ang mga kinahanglan nga dokumento nga ila man nga ipost sa social media site sang ahensya.
Matapos maaprubahan, sarang na nga makaderetso sa LandBank branches.
