May-ara sang kabudlayan ang Bacolod Police Station 7 sa pagtumod sa driver sang Pickup nga nagtughong sang fulltank sa isa ka gasoline station sa Bangga Panaad sa Brgy Alijis, Bacolod City, apang nagpalagyo nga wala nagbayad.
Sa interview sang Bombo Radyo Bacolod kay Police Captain JR Reyes, officer in charge sang Bacolod Police Station 7, ang insidente ang natabo sang Hulyo 17 sang aga, apang hapon na sang ginreport.
Kun sa diin isa ka lalaki nga nagamaneho sang brown nga Nissan Navarra Pickup ang nagpatughong sang Diesel nga fulltank sa balor nga P7,500.
Suno sa pump boy, nagpahayag ang driver nga siya ang magabayad paagi sa ATM.
Apang sang nagtalikod ang pump boy agud magkuha kuntani sang POS terminal, hinali nga nagpalagyo ang driver.
Ini ang nakita man sa CCTV footage, apang makita man nga wala sang plate number ang salakyan.
Suno kay Reyes, ipatsekyar kuntani nila sa Land Transportation Office kun may plate number, agud matumod ang identity sang tag-iya kag mapadal-an sang show cause order.
Sa pihak sini, siya ang magakoordinar gihapon sa LTO, sa paglaom nga may iban pa nga pamaagi agud mas hapos nga matumod ang driver.
Suno kay Reyes, madamo sang brown nga Nissan Navarra pickup, gani mabudlayan sila mag-isa isa sang mga wala sang plaka.
Apang sa desciption sang pump boy, ang driver ang yara sa late 30s ukon early 40s ang edad.
