Narecover ang masobra P5.4 million nga balor sang suspected shabu sa gina-alegar bag-ong kasal nga mga suspect sa drug buybust operation nga ginpatigayon sa Prk Mabinuligon, Brgy 35, Bacolod City alas-2:43 kaina sang kaagahon.
Ang mga nadakpan ang ginkilala nga sanday Jerhson Dalisay alyas Gard, 43 anyos; kag Anna Mae Bedoa, 31 anyos, residente sa Prk 5, Magsungay, Brgy Singcang-Airport, Bacolod City.
Narecover sa ila ang 10 ka knot tied transparent plastic bag; kag 5 ka big heat sealed transparent plastic sachet sang suspected shabu kalakip ang buybust item.
Ang suspected shabu ang ginabanta nagabug-at sang 800 grams nga may standard drug price nga P5,440,000.
Ang duha ka High Value Individuals ang nakahunong na sa Bacolod Police Station 1 kag natalana mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 1, dugay na ang ila monitoring kay Dalisay apang karun lamang nakapatigayon sang transaksyon ang operatiba.
Si Dalisay ang ginakilala nga runner ukon kabayo, samtang naga-upod upod naman sa iya mga transaksyon si Bedoa.
Suno kay Tolentino, ginaverify pa nila ang kamatuoran sa pahayag sang duha nga sila ang ginkasal na apang wala pa naproseso ang mga papelis sa Philippine Statistics Authority gani lainanay pa ang ila apelyido.
Pahayag man sini nga dako na ang napagwa sini nga supply antes natigayon ang operasyon.
Ang supply sang suspected shabu ang gikan sa gwa sang probinsya, nga mahimo gikan sa Luzon ukon sa Mindanao.
