Padayon pa ang imbestigasyon sa 25 anyos nga babayi nga gin-alegar ginhimuslan sang tatlo ka mga lalaki sa isa ka barangay sa ciudad sang Bacolod sang Sabado, Mayo 31.
Suno sa alegasyon sang biktima, gin-abduct ini kag ginrape sang tatlo ka lalaki kag wala na siya makahibalo kun diin siya gindala bangud gindrop lamang ini sa downtown.
Nakamask naman ang tatlo ka mga lalaki samtang ang biktima ang nagasuksok na lamang sang bayo kag shorts kag wala na sang suksok nga undergarments sang masapwan.
Nasapwan na lamang ini nga nagapangluya kag gilayon nga gindala sa ospital.
Sa interview sang Bombo Radyo Bacolod kay Police Lt. Rowena Magan, pinuno sang Women and Children Protection Desk sang Bacolod City Police Office, nagapangita sila sang CCTV nga mahimo nakarecord sa natabo.
Suno diri, tubtob sa karun wala pa sang may nakapablotter sa ila angot sa gina-alegar nga pagpanghimulos.
Yara pa man sa karun sa ospital ang biktima kag sa paggwa sini siya ang esturyahon agud makumpirmar sini mismo kun ano ang matuod-tuod nga natabo.
