Arestado ang isa ka gina-alegar miyembro sang Communist Party of the Philippines-New People’s Army nga nagapangatubang sang kaso nga murder kag frustrated murder sa Toboso, Negros Occidental sang Enero 14.
Ginkilala ang ginapatihan miyembro sang NPA nga si Alberto “Berting” Pandacan, 70-anyos kag miyembro sang NPA Northern Negros Front Komiteng Rehiyon-Negros.
Ang pagka-aresto sang militar kag kapulisan kay Pandacan ang kasunod sang pagkadakop man sa upod sini nga Ruffa Baynosa, 44-anyos sa Hacienda Ambulong, Barangay San Fernando, Talisay City sang amo man nga adlaw.
Sa impormasyon nga nakuha sang Bombo Radyo Bacolod, nadakpan si Pandacan sa iya balay sa Sitio Seraje, Barangay San Isidro paagi sa pagserbe sang warrants of arrest.
Ginapahayag nga kalakip si Pandacan subong man si Baynosa sa grupo sang mga rebelde nga NPA nga nag-ambush sa mga sibilyan sakay sa isa ka utility truck sa Sitio Toril, Barangay Salamanca, Toboso sang Hulyo 13, 2009 nga ginkamatay sang tatlo ka mga persona kag ginkapilas sang tatlo ka iban pa.
Sa karon, priso na si Pandacan kag nagapangatubang sang kaso nga frustrated murder kag murder.
