Welcome development para sa sektor sang mamumugon kun madayun ang ginaduso nga pagpanaog sang Value Added Tax (VAT) sa 12 percent gikan sa karun nga 10 percent.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA) dako na nga bulig para sa ordinaryo nga mga mamumugon ang pagpanaog sang VAT agud sila ang may-ara man extra nga budget.
Nahibaluan nga ginpamalabagan ni Finance Secretary Ralph Recto ang plano sa panindugan nga madamo sang mga proyekto nga maapektuhan ukon madulaan sang pondo kun mabuhinan ang revenue sang pungsod.
Apang panindugan ni Sancho nga sa nakita nga imbestigasyon batok sa kurapsyon sa mga flood control projects, makita nga dako nga pondo sang gobyerno ang ginakawat lamang.
Suno diri, nagsarurot na panaog ang purchasing power sang mga ordinaryo nga trabahante, ang kapigaduhon kag kagutom ang dapat ikonsiderar sang gobyerno.
Dako nga bagay ang pagbuhin sang VAT partikular na sa produktong petrolyo.
Panawagan sini sa gobyerno nga magcost-cutting.
Halimbawa sini ang wala-tuo nga mga seminars nga nagagasto sang milyon apang wala man sang maayo nga epekto.
Suno diri, sang siya ang yara sa Regional Wage Board, milyon ang ginagastos sa seminars, apang matapos sini wala man sang mapatuman kag amo gihapon ang minimum wage.
Sa baylo, ang makabulig pa kun kis-a sa mga pumuluyo amo ang underground markets, nga wala nagaresibo kag wala sang VAT, bangod ini ang mas barato.
Apang sa pihak sini, sila ang ginalagas sang gobyerno, nga kuntani ang effort ang gingamit sa paglagas sa mga dalagkuan nga negosyante nga nagalapas sa layi kaangay sang wala nagatuman sa minimum wage.
