Ginakabig sang presidente sang Taxi Operators of Negros Occidental (TONO) nga maayo nga balita kun madayon ang ginaduso sang mga senador nga pagsuspend sang Private Motor Vehicle Inspection Centers (PMVIC).
Ini ang kasunod sang pahayag ni Senator Grace Poe sang Senate committee on public servies nga ginarekomendar nila ang suspension sang PMVIC bangud mahal ang balayran diri kag wala sang layi nga ginbasehan sang Land Transportation Office sa pagdihon sini.
Suno kay Poe, tuman man ka gamay ang income sang gobyerno nagikan diri nga nagadangat lamang sa P100, 000 per annum.
Suno sa mga senador, indi maayo ang timing sang PMVIC bangud mahal ang balayran nga P1500 tubtub P1800.
Sa interview sang Bombo Radyo Bacolod kay Mario Eusebio, maayo nga balita ang pagduso sang suspension sang PMVIC bangud wala pa nakabangon ang mga taxi operators sa epekto sang COVID-19 pandemic.
Suno kay Eusebio, ginapaburan nila ang ginaduso sang mga senador bangud subong nga panahon, magadugang lang ini sa galastuhan sang mga operator.
Suno diri, naga-concentrate pa sila kun paano sila makabawi kag makaserbisyo sang maayo sa publiko samtang padayon ang pagpangatubang sang pandemya.
Suno kay Eusebio, sa tion nga indi pag-ipadayon ang pagpatuman sang PMVIC, dako nga pasalamatan para sa mga taxi operators bangud dako pa ang ila ginagastuhan kaangay sang maintenance.
