BACOLOD CITY – Magapatigayon ang Indonesian police sang DNA test sa pamilya sang seaman nga taga-Negros Occidental nga namissing sadtong bulan sang Enero matapos naglumpat sa barko sa baybayon nga sakop sang Indonesia.
Kaina sang udto, nakig-angot sa Bombo Radyo Bacolod ang opisyal sang Indonesia Automatic Fingerprint Identification System (INAFIS) agud nga maka-contact sa pamilya ni Michael John Abibiason sa Brgy. Taloc, Bago City nga naglumpat sa MV Shibumi sadtong Enero 16 sang gab-i.
Suno sa INAFIS, isa ka wetsuit nga may pangalan nga SHIBUMI VALLETTA ang nasapwan kaina sang kaagahon sang isa ka mangingisda sa Kolosoha Village sa distrito sang Tomia-Wakatobi sa Indonesia kag ini ang may unod nga tul-an sang butkon kag tudlo sang tawo.
Bangud sini, kinahanglan nga magpatigayon sang DNA test sa pamilya ni Abibiason agud matul-id kun kay Michael John ang tul-an nga nakit-an sa sulod sang immersion suit.
Sa una nga interview sang Bombo Radyo sa kapitan sang barko nga si Harvey Lazarte, nagduty pa si Abibiason bilang pirate watch pila ka oras antes siya naglumpat sa MV Shibumi.
Ini ang ginapatihan nga nag-suicide bangud gin-akigan sang chief engineer bangud nakakomiter sang sala samtang nagaduty sa makina bilang engine cadet.
