Nakuha sang Doña Montserrat Lopez Memorial High School sang Silay City ang kampeonato para sa Basketball Secondary Girls sang Negros Island Region Athletics Association Meet 2026 batok sa pambato sang Negros Occidental.
Nagtapos ang hampang sa score nga 88-53.
Sa interview sang Bombo Radyo Bacolod kay Jhalil Monserate, team captain kag gindeklarar nga Most Valuable Player (MVP), nagapati gid ini nga deserve nila ang kadalag-an bangod sa mga sakripisyo nga ginhatag partikular na sa training.
Suno diri, maayo ang bond sang ila nga team kag manami ang teamwork.
Gani umpisa pa lamang 100 percent na ang iya pagsalig nga sila ang magadaog.
Ang eskwelahan ang nakahampang na sa Palarong Pambansa sa tinalikdan nga mga tinuig apang sila ang napierde sa Western Visayas Regional Athletics Association Meet 2025.
Gani malipayon ini nga sila ang liwat nakabawi.
Suno kay Monserate, ang iya amay ang personal nga naga-coach sa iya, samtang kaupod man sini sa team ang iya manghod.
Apang una gid sini nga ginapasalamatan ang pag-ubay sang Ginoo kag paghatag sa ila sang kadalag-an. Samtang, pahayag sang coach sang nagdaog sa Basketball Secondary Girls sang Negros Island Region Athletics Association Meet 2026, nga ang kadalag-an ang bunga sang collaborative effort.
Ang finals ang sa tunga sang Silay City kag Negros Occidental.
Sa interview sang Bombo Radyo Bacolod kay Coach Peter Coniendo, nga manunudlo man sa Doña Montserrat Lopez Memorial High School sa Silay City, ang pagdaog sang team ang bunga sang pagpangabudlay sang mga atleta sa training.
Suno diri, ang intensive training ang ginahimo nila kada tapos sang klase kag sa masami nagakagab-ihan na ang mga atleta sa pagpauli.
Iban sa mga ini ang nagasakripisyo man nga makatraining bisan wala makakaon kag wala sang balon.
Gani antes paman, positibo na ini nga magadaog ang team.
Suno kay Coniendo, anom ka beses na nga nakasulod sa Palarong Pambansa ang eskwelahan, kag iban sa ila nangin bunga ang student-athlete naman sa mga dalagko nga universities kag colleges sa Manila.
Suno diri, luwas sa ila players, magapangita man ini sang maayo nga humalampang gikan sa iban nga team, nga makaupod nila sa paghampang sa Palarong Pambansa 2026.
