Aminado si Negros Occidental Governor Eugenio Jose “Bong” Lacson nga nakibot ini sang hinali nga magfile sang Certificate of Candidacy bilang gobernador si former Victorias City Mayor Francis Frederick “Wantan” Palanca.
Sa interview sa gobernador, ginpahayag sini antes paman ang filing naga-estoryahanay pa sila natuhoy sa mga perennial candidates ukon mga kandidato nga makapila na magpapili apang wala man nagadaog.
Gani nakibot ini sang mahibaluan nga hinali nagfile si Palanca sa ulihi nga adlaw sang filing period agud magbunggo sa iya nga magapapili para sa ikatatlo nga termino.
Ginkumpirmar naman sini nga ang bilog nga Team Asenso slate sang Victorias City ang nagasuporta sa iya kandidatura kalakip na ang bata ni Wantan Palanca nga si Councilor Derek Palanca.
Sa pihak nga bahin, ginapakamaayo ni Lacson nga wala sang nagluntad nga untoward incident sa walo ka adlaw nga COC filing period magluwas lamang sa insidente sang pagtuyo nga pag-agaw sang COC form sang Mayoralty aspirant sa Himamaylan City.
Madumduman nga padulong sa COMELEC Office si City Engr. Vicente Genova sang hinali nga ginkuha sang isa ka lalaki ang iya folder nga naga-unod sang COC form kag mga requirement.
Ila ini nga nabawi apang ang lalaki kag kaupod sini ang naghana pa nga magbato antes nalagyo, kag ang insidente ang natabuan man nga nakuhaan sang video./
Suno kay Lacson, dapat nga maimbestigaran ang insidente kag nagalaom ini nga apisar magahod ang kampanya, mangin malinong ang 2025 Midterm Elections sa Negros Occidental.
