May nagluntad nga grassfire sa Barangay Masulog, Canlaon City, Negros Oriental tuga sang mga ballistic projectiles nga naggikan sa bulkan Kanlaon kasunod sa nagluntad nga moderately explosive eruption, kagab-i.
Sa interview sang Bombo Radyo Bacolod kay Engineer Mari Andylene Quintia, resident Volcanologist sang Kanlaon Volcano Observatory, alas- 6:07 naglupok ang bulkan kagab-i nga naglawig sa sulod sang isa ka minuto.
Suno diri, duha ka beses nga nagbuga sang abo ang bulkan kag may siyam ka volcanic earhtquakes nga nabatyagan lakip na ang duha ka volcanic tremors.
Nagdangat naman sa 1,085 tonnes per day ang ginabuga nga sulfur dioxide sang bulkan kun sa diin ang plume naglab-ot sa 5,000 meters ang kataason padulong sa northeast kag southeast nga dereksyon.
Suno kay Quintia, paglupok sang bulkan may ballistic projectiles ukon ang mainit nga dalagko nga bato nga naglupad gikan sa baba sang bulkan kag nagtupa sa area sa Sitio Mananawin, Barangay Masulog.
Bangod tuman ka init sang bato, nasunog ang hilamon sa lugar kun diin ini nagtupa nga nagresulta sa grassfire.
Pahayag sini, subong nga tuig tatlo ka beses na nga naglupok ang bulkan apang ginalauman nga liwat pa nga matabo ang eruption bangod sa magmatic unrest sa bulkan.
