Ginbuy-an na sang pwersa sang Israel ang tanan nga mga gina-alegar aktibista nga ila gin-intercept sang Huwebes magluwas sa duha ka pro-Palestine activist.
Ginbalabagan kag ginpangdakop sang Israeli Navy ang kapin 170 ka mga aktibista nga sakay sa 22 ka mga baruto nga kargado sang mga aid kaangay sang pagkaon, bulong, kag iban pa, sa bahin sang island of Crete sang Huwebes, Abril 30.
Gintawag sang mga organizers sang Global Sumud Flotilla (GSF) nga “piracy” ang ginbuhat sang mga militar sang Israel, kag nagasiling nga ang ila mga myembro ang gin-intercept 600 miles ang kalayuon sa Gaza, kun sa diin yara sa idalom sang Israeli naval blockade.
Samtang ginsabat naman ini sang foreign minister sang Israel nga “PR stunt” kag indi matuod nga humanitarian act.
Kalabanan sa mga gindakop ang makabalik na sa ila tagsa ka pungsod gikan sa Greece, samtang ang duha ka aktibista ang nagapabilin nga yara sa kustodiya sang Israel para ipaidalom sa imbestigasyon.
