Nagcommit ang kadam-an sa mga backyard raisers sa Negros Occidental nga itigana sang mga ini ang mga ginasagod nga baboy para sa local production sa maabot nga holiday season.
Nakaandan na nga madamo sang mga ginaluto sa bulan sang Disyembre kag indi madula sa lamesa ang mga putahe gikan sa baboy.
Sa interview sang Bombo Radyo Bacolod kay Alliance of Hog Raisers Association of Negros Occidental (AHRANO) President Pastor Ric Lauron, ginpasalig sang mga ini nga may bastante nga supply sang baboy sa Disyembre.
Ini bangod antes paman, gin-adjust na nila ang timeline sa pagsagod agud sarang na nga maihaw ang mga baboy sa holiday season kun sa diin mataas ang demand.
Agud indi kulangon sa supply, kadam-an ang nagkomiter nga itigana nila sa local consumption ang ila mga baboy kag ipaiway anay ang pagpadala sa iban nga mga probinsya.
Ginapakamaayo man ni Lauron nga wala na sang naapektuhan sang African Swine Fever bangod man sa ginpaayo nga biosecurity.
Pangabay sini nga magapabilin ang sitwasyon kag indi na magbalik pa ang ASF sa probinsya.
Sa karun, 62 tubtob 65 porsyento sang ila nga miyembro ang nakabalik na sa pagsagod sang baboy.
Sa pagsaka sang demand, aminado si Lauron nga may gamay nga mangin pagsaka sa presyo, apang pasalig sini nga indi tuman ka dako ang pagsaka.
Sa karun yara sa P320 tubtob P340 ang kada kilo sang baboy sa merkado.
