Nagapanawagan ang Chairman sa One Negros Ecumenical Council (ONE-C) nga suportahan kag lapawan pa ang kinahanglan nga pirma sa ipalibot nga signature campaign para sa pagduso sang matuod-tuod nga Anti-Political Dynasty Law.
Sa interview sang Bombo Radyo Bacolod kay Bishop Gerardo Alminaza sang Diocese of San Carlos, apat ka dekada na nga ginahulat nga may mapasar nga anti-political dynasty bill santo sa 1987 Philippine Constution.
Ini ang ginpadugayan tubtob sa may ginfile na nga hagna nga sa karun yara na sa final reading sa Kongreso.
Apang panindugan ni Bishop Alminaza nga ang ginaduso sang mga mamalidha nga Anti-Political Dynasty Bill ang indi man matuod-tuod nga batok sa political dynasty, sa baylo ini ang magahatag pa sang justification para sa ila.
Pahayag sini nga sila ang magapalibot sang signature campaign, nga sa tion nga makakuha sang 10 percent sang total number of voters, sarang na nga masumiter sa Commission on Election para sa paghimo sang referendum.
Sa referendum, ginahatagan ang publiko sang kahigayunan nga derekta nga makaboto sa pagpasar sang layi.
Aminado si Bishop Alminaza nga ini ang mabudlay, apang diri sarang mapakita ang people power kag mapamatud-an ang demokrasya.
Pahayag sini nga kinahanglan nga makakuha sang pirma sang three percent sang total population sa kada distrito para malab-ot ang kinahanglan nga numero.
Panawagan sini sa mga Negrense nga pangunahan ang inisyatibo kag lapawan pa ang prsyento sang kinahanglan nga pirma.
Pahayag sini nga sa ginaduso sang mga mamalidha, tubtob lamang sa second degree of consanguinity ukon direct family related kaangay sang mag-asawa, lolo kag lola, mga kabataan, kag mga apo, ang indi pwede makapapili sa isa lamang ka lugar.
Apang ang ila nga ginaduso ang tubtob sa 4th degree of consanguinity ukon kutob sa pakaduha.
Samtang luyag man nila nga madumilian ang succession ukon pagbulos sang bata inkaso matapos na ang termino sang amay, paagi sa paglatag sang cooling-off period.
Pinaagi sini, mahatagan man sang kahigayunan ang iban nga may ikasarang man sa pagpamuno apang wala lamang sang political machineries ukon kwarta nga magamit sa kampanya… Samtang, ginaduso sa karon sang Simbahang Lingkod ng Bayan ang “Dapat Isa Lang” ukon pagpasar sang isa ka matuod-tuod nga Anti-Political Dynasty Law sa Pilipinas, nga may katuyuan nga limitahan sa isa lamang ka myembro sa kada pamilya ang makakuha sang posisyon sa gobyerno.
Sa interview sang Bombo Radyo Bacolod kay Miguel Karlo Abadines, Executive Director sang Simbahang Lingkod ng Bayan, ginpahayag sang coalition nga indi matuod-tuod ang anti-political dynasty bill nga ginapasar subong sa kongreso bangud nagadumili lamang ini sang tubtob sa second degree of consanguinity ukon relation gani suno diri, daw indi masabat ang isyu sang dinastiya sa pungsod.
Tuyo sang grupo nga mapatuman ang isa ka national anti-political dynasty law nga magasakop sa nagkalain-lain nga posisyon sa gobyerno, halin sa Presidente tubtob sa party-list representative, kasubong man sa gobernador tubtob kagawad nga posisyon.
Ini ang may restriction tubtob sa fourth degree of consanguinity.
Lakip sa ginakonsiderar nga tikang sang grupo amo ang People’s Initiative agud mangin instrumento ang pwersa sang ordinaryo nga mga pumuluyo sa pagduso sang anti-political dynasty measure sa national level.
Paagi sa signature campaign, target sang ila nga kampanya nga makakuha sang 7.5 million ukon masobra pa nga pirma sang registered voters nationwide sa diin, sa kada distrito, nagakinahanglan sang indi magnubo sa 3 percent sang total registered voters.
Ini ang plano nga ipatigayunon gamit ang teknolohiya sa pagpakig-angot sa COMELEC.
Suno kay Abadines, plano ini nga mapatuman antes ang filing sang certificate of candidacy (COC) para sa 2028 elections.
