Naalarma naman ang sektor sang negosyo sa asud-asud nga shooting incident sa ciudad sang Bacolod kun sa diin isa sa mga biktima ang isa man ka negosyante.
Nahibaluan nga patay ang 29-anyos nga babayi matapos gintiro samtang nagasakay sa tricycle sa atubang sang Ayala Mall sa Gatuslao Street, Barangay 8, Bacolod City sang Sabado sang gab-i.
Nagikan sa 888 China Town Square si Medelyn Benignos, 29 anyos kag residente sang Purok Lampirong, Barangay 2, Bacolod City kag nagsakay sa depampasahero nga tricycle.
Sang yara na sa dalan sa atubangan sang Ayala Malls Capitol Central ang tricycle, hinali lang ini nga ginpalapitan sang riding-in-tandem suspects kag ginluthang sa ulo ang biktima.
Nakuha sa crime scene ang duha ka fired cartridge case kag duha ka slug sang armas-luthang.
Suno kay Frank Carbon, chief executive officer sang Metro Bacolod Chamber of Commerce and Industry (MBCCI), ginpanindugan sini nga indi lang dapat pagkabigon nga isolated case ang nagakatabo nga shooting incidents sa ciudad.
Suno sa iya, dapat nga imbestigaran ini sang husto kag lantawon ang rason agud maangot-angot kun ano gid ang problema.
Nagpanugyan man ini nga dapat ireview liwat ang mga lugar nga madulom kag dapat pasigahon ang tanan nga poste.
Dapat man suno kay Carbon nga ibalik kag pasangkaron pa gid liwat ang motorized anti-street crime operatives agud malikawan ang mga kaangay nga krimen.
