Ginpahayag ni Energy Undersecretary Alessandro Sales nga padayon nga ginabantayan sang ahensya ang suplay sang LPG agud masiguro nga indi ini magkulang.
Agud mapabakod pa gid ang reserba sang gatong, ginpahayag ni Energy Secretary Sharon Garin nga magabakal ang gobyerno paagi sa Philippine National Oil Company (PNOC) sang isa ka milyon nga bariles sang diesel nga naglab-obot sa P10 bililon ang balor.
Apang aminado si Garin nga ang amo nga kadamuon halos isa ka semana nga konsumo lamang sang pungsod.
Sa subong, yara na sa 400,000 ka bariles ang na-secure sang PNOC, samtang ginapaabot pa ang dugang nga 140,000 ka bariles antes matapos ang Marso.
Suno diri, kuhaon ang suplay halin sa nagkalain-lain nga pungsod lakip na ang sa Southeast Asia agud indi magsalig sa isa lamang ka ginakuhaan kag masiguro ang padayon nga suplay.
Ginpahayag man sang Department of Energy (DOE) nga importante ang pagpatindog sang buffer stock bisan limitado ang kapasidad bangud makabulig ini sa pagsiguro nga indi maubusan sang gatong ang pungsod sa tunga sang krisis nga ginaatubang sang pungsod.
