Ginaduso sa karon sa senado ang isa ka hagna nga may tinutuyo nga magpatuman sang mas mahugot nga transparency sa mga kumpanya sang langis sa pungsod kasunod sang mga reklamo sa publiko natuhoy sa gina-alegar anomilya sa pagsaka sang presyo sang petrolyo.
Sa idalom sang Senate Bill No. 641, hatagan sang gahum ang Department of Energy (DOE) nga i-obligar ang mga oil company nga magsumiter sang detalyado nga listahan sang ila presyo sang langis kalakip na ang aktwal nga gastos.
Suno kay Sen. Erwin Tulfo nga co-author sang nasambit nga proposal, dapat mangin maathag ang mga oil company sa ila nga actual costing.
Samtang madumduman nga ginpahayag sang DOE sa hearing sang Senate Committee on Ways and Means, nga sila ang nagpadala na sang sulat sa mga gasolinahan nga ginasuspetsahan nagapang-abuso ilabi na sa gina-atubang subong nga krisis sa bug-os nga kalibutan.
Apang, aminado ang ahensya nga limitado ang ila nga gahum sa idalom sang Oil Deregulation Law.
Ginpahayag ni Tulfo nga kinahanglan ang mas permanente nga solusyon pinaagi sa kasuguan, agud masiguro nga may salabton ang mga kumpaniya kag protektado ang mga konsumidor.
