BACOLOD CITY – Arestado ang lima ka mga kalalakin-an, lakip na ang isa ka menor de edad, sa ginpatigayon nga buy bust operation kun sa diin halos isa ka milyon ka pesos ang balor sang shabu nga narekober sa Sharina Heights Subdivision, Barangay Taculing, ciudad sang Bacolod las-5:30 kaina sang hapon.
Subject sang operasyon ang 17-anyos nga suspetsado kun sa diin nadakpan man ang magulang sini nga si Omar Corot, 18-anyos, soltero, pareho nga nagapuyo sa balay sang ila nga lolo.
Naarestar man sanday Jelmer Reyes, 18-anyos, pumuluyo sang Barangay 39, ciudad sang Bacolod; Reynaldo Debidi, 26-anyos, pumuluyo sang Purok Gonzaga, Barangay Taculing, ciudad sang Bacolod; kag Angelo Garcanila, 21-anyos, pumuluyo sang Barangay Matab-ang, ciudad sang Talisay.
Suno kay Police Insp. Joey Mara sang Regional Drug Enforcement Unit (RDEU) Region 18, ila na-recover ang isa ka elongated plastic sachet nga nagaunod sang ginapatihan shabu nga amo ang buy bust item kag 500 pesos nga marked money.
Sa pagsulod sa puluy-an, nakakuha pa ang operatiba sang napulo ka elongated plastic sachet nga nagaunod sang suspected shabu, 17 ka bulto sang ginapatihan shabu, P5,500 nga kwarta nga ginapatihan kita sa pagbaligya sang ilegal nga druga kag mga drug paraphernalia.
Suno kay Mara, ginabulubanta 850 mil pesos ang balor sang narecover nga druga.
Magluwas sa RDEU, nag-upod man sa operasyon ang City Drug Enforcement Unit (CDEU) kag Police Station 6.
