Indi na pagdayunon sang Punong Barangay sa Brgy Ara-al, La Carlota City ang highlights kuntani sang ila kapiestahan bwas, Pebrero 21 matapos liwat nga naglupok ang Bulkan Kanlaon.
Sa interview sang Bombo Radyo Bacolod kay Punong Barangay Carlos Natuel, preemptive evacuation lamang ang ginapatigayon sa idalom sang Alert Level 2 nga status sang bulkan.
Gani ginprayoridad lamang nila ang mga may respiratory illness kaangay sang may hapo, kabataan, senior citizen, nagabusong kag persons with disabilities (PWDs).
Nagdangat sa masobra isa ka gatos nga indibidwal ang mga nagbakwit ukon kabug-usan nga 34 ka pamilya, nga yara sa karun sa La Carlota South Elementary School 1.
Ginapakamaayo man sini nga madasig ang pag-amuma sa mga evacuees.
Suno kay Natuel, may pila ka Purok nga naka-eksperyensya sang light ashfall, kag ang pinaka-nahalitan amo ang Sitio Guintubdan.
Pahayag sang Punong Barangay nga antes ang eruption, nagameeting pa sila sa Barangay kag isa sa ila na-estoryahan kun paano mapasanyog ang turismo.
Suno diri, bwas na kuntani ang ila nga highlight sang kapiestahan, apang bangod sa sitwasyon ini ang indi na lamang padayunon.
Pahayag ni Natuel nga tuman ka damo sang abo partikular na sa Sitio Guintubdan.
Aminado ang Punong Barangay nga pila pa ka ulan ang kinahanglan agud maflash-out ang madamol nga abo, samtang delikado man ang dalan bangod madanlog kun mabasa ang abo.
Pahanumdom ni Natuel sa mga pumuluyo nga magpabilin nga alerto, kag magpreparar na sang “go bags” nga gilayon mabitbit inkaso magpatuman sang evacuations.
