Mismo ang Punong Barangay sang Barangay 10, Bacolod City ang nagdala sa iya nga hinablos agud nga magsungka sa Bacolod Police Station 2 matapos nga isa ini sa apat nga natumod nga suspek sa nagluntad nga shooting incident sa nasambit nga Barangay sang Marso 25 sang gab-i.
Sa interview sang Bombo Radyo Bacolod kay Punong Barangay Melvin Bravo, alas 3:30 ang takna kaina sang kaagahon gindala sini ang iya hinablos sa Bacolod Police Station 2 agud nga magsungka.
Suno kay Bravo, ang hinablos sini nga si alyas Timothy ang nagtawag sa iya kag naghambal nga masungka ini gani gintawgan sini si Police Major Eugene Tolentino, station commander sang nasambit nga police station agud nga ma-facilitate ang pagsungka sini.
Suno pa sa Punong Barangay, nagpalagyo ang hinablos sini matapos ang krimen.
Nagpangayo man mismo ang iya hinablos sang pasensya sa nahimo sini matapos ang shooting incident.
Wala man sang idea si Bravo kun sin-o ang nagapanag-iya sang armas-luthang nga gingamit sa paghimo sang krimen apang yara ini sa possesion sang iya hinablos.
Suno diri, suno imbestigasyon kag ginpahayag sang hinablos sini sang gin-interview nga siya ang nakatiro sa biktima.
Siya na mismo ang nag engganyo sa iya hinablos nga magsungka kag indi na paghulaton nga madagdagan pa ini sang korte sang warrant of arrest.
Madumduman nga pangayaw sa lugar ang duha ka biktima, nga sa ila impormasyon tumandok sang Cadiz City.
Ang mga suspect ang ginkilala nga sanday Alyas Macoy, nga amo ang gunman, kag kaupdanan sini nga sanday Alyas Moy, Alyas Rey kag Alyas Roy, nga nagbulig sa pagkastigo sa mga biktima.
Tatlo ang residente sang Brgy 10, samtang si Moy ang residente sang Brgy 12.
Si Rey naman ang naga-isahanon nga minor sa mga suspect.
Nagapabilin ang duha ka mga biktima sa ospital nga ginadapatan sang pagbulong.
