Bisan nabudlayan ini maglakat, nagtinguha gid ang isa ka hotcake kag juice vendor nga magpadulong sa Bombo Radyo agud nga magreklamo batok sa hepe sang La Carlota City Police Station nga nagtiro sa iya sa batiis.
Suno kay Ricky Antonio Espanola sang Barangay Ma-ao, Bago City, nagbaligya ini sang palamig kag hot cake sa plaza sang La Carlota kadungan sang Pasalamat Festival sang Abril 29.
Sang nagapanghimos ini sang iya gamit sang April 30 sang kaagahon, may naglabay nga mga pamatan-on kag hinali lang ini ginlampusan sa liog nga nagresulta sa iya nga pagkatumba.
Ginlagas ni Espanola ang naglampos sa iya apang wala niya nadakpan.
Nagbalik ini sa iya nga balaligyaan kag nagkuha sang sundang agud nga kiboton ang mga pamatan-on.
Nagbalik ini sa iya nga motorsiklo kag didto niya nasugata ang hepe sang La Carlota City Police Station nga si Police Lt. Col. Lowell Garinganao nga wala nakauniporme kag nakainom sang makahulubog nga ilimnon.
Nagpasalba si Garinganao kag nagsinggit nga madulog si Espanola gani nagpundo ini kag ginhaboy ang iya nga sundang.
Nagpalapit si Garinganao sa iya kag nagpalupok liwat, ginpahapa niya si Espanola apang wala ini naghapa bangud suno sa iya, nagabiring ang iya nga batiis sa sobra nga dalagan gani nag-amat-amat lang ini luhod.
Sa ikatatlo nga lupok, naigo si Espanola sa natuo nga pusog-pusugan kag diri na nag-abot ang patrol car sang La Carlota City Police Station nga amo ang ginpasakyan sa iya samtang nakaposas.
Suno kay Espanola, ginkastigo pa ini sang mga pulis bisan nakaposas na ini.
Gindakop man sang mga pulis ang mga naglampos kay Espanola apang ginpagwa ini sa selda samtang siya ang yara sa prisuhan.
Gindala sang mga pulis si Espanola sa pribado nga ospital sa La Carlota apang sa karon, indi na ini makatrabaho bangud naghubag ang iya pilas kag indi makalakat sang maayo.
Ang bill ni Espanola sa ospital nga P100,000 ang ginbayaran ni Garinganao kag ginpasaanan man ini nga siya ang buligan sa financial needs.
Suno sa biktima, indi na ini makatrabaho sa karon agud nga mabuhi ang iya pamilya bangud indi ini makatikang sang maayo gani nagahingyo ini sang bulig kay Garinganao. SAMTANG Nagsabat si Police Lt. Col. Lowell Garinganao sa tanan nga mga alegasyon sang hotcake kag juice vendor nga si Ricky Antonio Espanola nga iya gintiro sa batiis sang Abril 30 sang kaagahon.
Suno kay Garinganao, naglibot ini sa ciudad agud imonitor ang mga police personnel nga nakadeploy agud maghatag sang seguridad sa Pasalamat Festival.
Nakita ni Garinganao nga nagadalagan si Espanola samtang ginahandos ang biktima nga si Roan Santiana sang Barangay Ayungon, La Carlota City.
Ginsinggitan niya si Espanola nga magpundo apang wala ini nakabati gani nagpasalba ang hepe sang isa ka lupok.
Ginhambalan man sang hepe si Espanola nga buy-an ang kutsilyo apang nagpalapit ini sa iya.
Sang nakita ni Garinganao nga in danger ang iya kaugalingon, nagpalupok ini liwat tubtub nga nabuy-an sang biktima ang kutsilyo.
Nagpalupok liwat ang hepe nga nag-igo sa semento gani naigo sang fragments sang bala ang batiis ni Espanola samtang naigo man ang kamot, paa kag guya ni Garinganao bangud sila ang lapitanay lang.
Gindala nila sa ospital si Espanola, ginpaidalom sa X-Ray kag ginpaoperahan kun sa diin wala ini sang ginbayaran.
Aminado naman ang hepe nga wala siya nakasuksok sang uniform sang natabo ang insidente bangud kaagahon na kag naglibot lang ini agud icheck ang iya mga tinawo.
Ginpanginwala man sini nga hubog ini sang natabo ang insidente gani ginawelcome niya kun nagaplano si Espanola nga magfile sang reklamo batok sa iya.
Nakibot naman ini nga nagpa-Bombo ang biktima bangud suno sa iya, bukas ang iya opisina kun nagakinahanglan sang bulig si Espanola kaangay sang inugbakal sang bulong.
