Mahimo mangin inspirasyon sa iban nga masami nga naga-inom sang makahulubog nga ilimnon ang isa ka lalaki sa Brazil nga imbes nga mangita sang gamo, siya nagpartisipar sa isa ka running race agud madula ang iya hangover.
Nagdesisyon si Isaque dos Santos Pinho nga mag-intra sa 8km running race kag wala ini naglaum nga bangod sa iya pagdalagan, dako ang mangin epekto sini sa iya kabuhi.
Wala sang balay si Pinho kag masami nga naga-inom inom apang isa ka adlaw nagdesisyon ini nga magpartisipar sa running race agud madula ang iya hangover.
Bisan nga wala ini nakaparegister sa competition kag nagasuksuk lamang sang tsinelas, nag-intra ini sa gihapon kag nagdalagan sang nabatian ang start signal.
Wala sini natapos ang 8km nga dalagan apang nakakuha ini sang complementary medal bilang pamatuod nga siya kabahin sang event.
Nagviral ang pag-intra ni Pinho sa race kag nahibaluan nga gamay pa lamang siya sang ginbayaan sila sang iya amay kag nagdako nga nalulong sa makahulubog nga ilimnon tubtob nga nadulaan ini sang balay.
Apang sa karun, madamo sang nagdonar sa iya sang running shoes, mga bayo, running glasses kag invitation para i-train siya sang professional runners, kag nakig-angot man sa iya ang gobyerno agud hatagan siya sang imbetasyon para sa mga pala-aboton nga running events.
Suno kay Pinho, nag-untat na ini sa pag-inom sang makahulubog nga ilimnon kag ginabag-o niya na ang iya pagpangabuhi.
